ناوه‌ڕۆك
چیرۆکی سەرەکی
لە شاری لیوژووی باشووری چین، زۆربەی ئەو ئۆتۆمبێلانەی لەسەر شەقامەکان دەبیندرێن، ئۆتۆمبێلی بچووکی کارەبایین.
درێژەی بابەت
خەڵکی چین روویان لە کڕینی ئۆتۆمبێلە کارەباییەکان کردووە و بەگوتەی خۆیان سوودی زۆریان لەو ئۆتۆمبێلانە بینیوە.
چاو، هاووڵاتیێکی دانیشتووی شاری لیوژووە و دەڵێ "ئەو جۆرە ئۆتۆمبێلانە لێخوڕین و بارگاویکردنیان ئاسانە؛ دەتوانی لە هەموو شوێنێک وێستگەی بارگاویکردن بدۆزینەوە و شوێنی پارککردنیش بە ئاسانی دەستدەکەوێت. جگە لەوە نرخیشیان گونجاوە."
ئۆتۆمبێلەکە دۆستی ژینگەیە و بە یەکجار بارگاویکردن دەتوانیت 215 کیلۆمەتر ببڕێت.
چین، گەورەترین بازاڕی ئۆتۆمبێلە بچووکە کارەباییەکانە و تاوەکو ئێستا زیاتر لە چوار ملیۆن ئۆتۆمبێلی کارەبایی بچووک لە شەقامەکانی ئەو وڵاتەدا هەن.
خەڵک دەڵێن، ئەو جۆرە ئۆتۆمبێلانە بەکارهێنانیان بۆ ژیانی رۆژانە ئاسانترە و بەراورد بە ئۆتۆمبێلەکانی دیکە خەرجیشیان کەمترە.
شیۆنگ، هاووڵاتیێکی دیکەی چینی دەڵێ "راستییەکەی من و زۆربەی خەڵک لەبەر نرخەکەی ئەو جۆرە ئۆتۆمبێلانە هەڵدەبژێرین. ئێمە ناتوانین بەو مووچەیەی هەمانە و بەو نرخە زۆرە، سووتەمەنی بکڕین، لەبەرئەوە ئێمە هەموومان ئەو جۆرە ئۆتۆمبێلانە هەڵدەبژێرین."
چین، دروستکردنی ئۆتۆمبێلی کارەبایی وەکو پیشەسازییەکی گرنگ و گەشەسەندوو دەبینێت و پاڵپشتییەکانی بۆ ئەو پیشەسازییە زیاتر کردووە، پلانیشی هەیە تاوەکو ساڵی 2035 هەموو ئەو ئۆتۆمبێلانەی لە بازاڕەکانی ئەو وڵاتەدا دەفرۆشرێن، بە وزەی کارەبا و وزەی نوێ کاربکەن.
247 بینین
